《延禧》半數人馬再聚《皓鑭傳》!1月19首播瓔珞乾隆再續前緣 ，又要掀起追劇潮～

講到2018最hit劇集，一定要提到《延禧攻略》，呢套大陸古裝劇一播出就成功掀起一場煲劇潮！3位主角之間嘅三角戀，以及妃嬪間嘅勾心鬥角，都令觀眾睇得好入迷～而《延禧攻略》一班主要人馬嘅新劇《皓鑭傳》相信又會再次引起轟動！《延禧》入面飾演瓔珞嘅吳謹言，將會同演乾隆嘅聶遠重新合體，再續未了緣，最新消息指劇集將會於1月19首播，Fans們一定唔可以錯過啦～！

Photo from 《皓鑭傳》劇照

《皓鑭傳》原本係計劃緊接住《延禧攻略》結局後3個月內播出，仲曾經宣佈過將會於2018年11月15號上檔，但因為中國廣電總局嘅「限古令」，令劇集只好無限期閣置！不過今次有好消息要帶比各位等候已久嘅劇迷，官方宣佈終於定檔2019年1月19日，每周六至周二晚上8點鐘更新兩集～Fans們一定要快啲Mark低日子，準備迎接瓔珞同乾隆再次相愛相殺嘅故事啦！

Photo from 《皓鑭傳》劇照

今次《皓鑭傳》嘅演員陣容就包括有：吳謹言、聶遠、「高貴妃」譚卓、「明玉」姜梓新、「袁春望」王茂蕾、「和親王弘晝」洪堯、「愉妃」練練、「李玉公公」劉恩尚、「吉祥」張澤、「小全子」鄭龍等人！可以話係超過接近半個《延禧》劇組都有參與《皓鑭傳》～

Photo from 《皓鑭傳》

劇集講述，戰國時期趙國御史之女李皓鑭（吳謹言 飾）慘被陷害被繼母賣掉後，被商人呂不韋（聶遠 飾）買下並多加調教下一路向上爬。然後更被獻給秦國王子嬴異人，為佢誕下兒子嬴政（秦始皇），成為歷史上嘅趙姬！

Photo from 《皓鑭傳》劇照

其實李皓鑭一角同瓔珞有相似嘅地方，都係聰明機智、冷靜勇敢，喺爾虞我詐中求存。而喺感情線方面，李皓鑭、呂不韋同埋秦國皇子仲會發展成一段三角戀。聶遠飾演嘅呂不韋雖然愛上李皓鑭，但為咗要助佢報復家族情仇，只好扶持佢一步步登上秦國皇后之位。

Photo from 《皓鑭傳》劇照

加上之前吳謹言喺接受訪問嘅時候，已經講過：「李皓鑭和呂不韋的關係會『更加愛恨糾葛』，李皓鑭又是一個很厲害的女人！」加上《皓鑭傳》同樣由于正打造，未開播就已經先造成轟動，令人等唔切想即刻睇啦～

Photo from 《皓鑭傳》劇照

Text：GirlsLike Editorial

Photo Source：《皓鑭傳》