見證白頭到老的動容～楊千嬅、丁子高化老人妝變80歲，千嬅落淚相擁：看80歲的他，鼻子馬上酸。

By Michelle on 14 Mar 2019

Digital Editor

楊千嬅同丁子高於2009年喺美國秘密註冊結婚，之後再喺香港補辦豪華婚禮。當年有好多人都唔睇好呢段「姐弟戀」，如今二人牽手走過10個年頭，非常恩愛～千嬅今日就上載一張跟丁子高嘅「老人相」，透露因拍廣告關係，第一次化老人妝，扮演年老嘅自己，而老公則以神秘嘉賓客串演出。當兩個人對視，見到對方滿臉皺紋、頭髮花白，可以話係悲喜交集，千嬅感慨咁話：「仰頭一看面前那個80歲的他，鼻子馬上酸起來，那種莫名的感動和傷感，原來那種離別的恐懼是這樣的。」

Photo from yeungchinwah ＠ ig

有人話婚後想知老公對老婆好唔好，睇老婆個樣就一清二楚，因為一個有老公錫嘅女人必定春風滿面、越來越靚，見到千嬅無咩點變過就知丁子高有幾錫佢～

Photo from yeungchinwah ＠ ig

千嬅今日喺個人社交平台上載咗幾張工作相片，只見千嬅頭髮花白，臉上長滿皺紋，原來係拍攝新廣告～千嬅話：「客戶非常用心，為了拍攝到我們看見自己瞬間變老的驚訝一刻，在化妝過程中，不讓我們照鏡。所以，當看到滿布皺紋的面龐及雙手，那一刻，真的以為自己變老了。」千嬅更讚嘆韓國專業化妝師嘅巧奪天工，「欣賞着鏡中銀髮紫得更紫的自己。」突然，丁生喺呢一刻突然出現喺千嬅眼前......

Photo from yeungchinwah ＠ ig

當千嬅見到眼前熟悉的面龐剎那間變得兩鬢斑白嘅樣，一時感觸，二人不禁相擁、落淚......生老病死，係萬物無法逃避嘅命運，亦係見證住時間推進嘅過程，人始終對於老、病、死存著不安感。千嬅喺ig上講到「原來那種離別的恐懼是這樣的......我們活在當下，應珍惜感恩，一個廣告工作，卻得到一個同偕到老的指引，有意思。」又搞笑謂：「估唔到，竟然係丁生喊先過我！」