八仙塵爆生還者全身91%灼傷～男朋友不離不棄為她紋上刺青！感激媽媽盡心盡力照顧！

仲記得八仙塵爆依場15人死、484人受傷嘅悲劇嗎？2015年6月27日台北八仙樂園舉行咗一連5日嘅彩色派對，但就喺第3日因高濃度粉塵被舞台燈高溫照射後引起爆炸而被逼終止活動。蔣欣宸就係其中一個全身91%灼傷嘅生還者～4年過去，如今31歲嘅佢回憶當年仍心有餘悸，不過難關過後卻十分感激盡心盡力照顧佢嘅媽媽同不離不棄嘅男朋友。

蔣欣宸回憶喺塵爆嘅一刻，為咗唔想被惡火燒到眼睛因此雙手遮蓋著臉，但就喺短短幾秒佢全身經已被火海包圍～餘下嘅40秒蔣欣宸身上91%皮膚已經燒到焦黑而掉落。

Photo from apple daily

可惜灼傷嘅佢要等待超過3個鐘先有救援，求生意志堅決嘅佢當時心想：唔可以暈倒！唯有醒著先可以救自己！到達醫院後馬上進行咗筋膜切割手術同喺四肢開16刀散熱，手術醒後嘅痛先係令佢最生不如死，每分每秒都同疼痛拉鋸，忍受著前所未有嘅疼楚。

Photo from apple daily

4年過去，蔣欣宸最想多謝媽媽同男朋友。喺今次塵爆事件，媽媽要一個人扛起300多萬醫療費，除左媽媽日以繼夜到髪型店工作賺取金錢外，幸好有保險賠償同慰問金先可以渡過難關。而喺最近佢都勇敢接受咗攝影師邀請，披著彩色羽翅影咗一輯相，希望鼓勵同樣因意外而帶來永久損害嘅朋友努力生活，以生命改變生命。

Photo from devin.tai@Facebook

Photo from devin.tai@Facebook

旁人見到佢身上嘅疤痕都會投以好奇嘅目光，因此令佢變得自卑。幸好男朋友並無因為咁而厭棄佢，仲對佢不離不棄～男朋友話依家嘅疤痕好似美人魚魚鱗一樣靚，亦為佢做咗樣從來都唔做嘅事～喺手臂紋上象徵勇敢嘅「火海中的美人魚」，鼓勵佢唔好怕人地嘅目光同二人就好似個紋身咁伴隨一身，永分不開。

Photo from apple daily

Photo from apple daily

Text：TopBeauty Editorial

Photo Source：Facebook, Apple Daily

Source：Apple Daily