18年後經典神作重現銀幕！開拍《尋秦記》電影版，古天樂、林峯、宣萱等演員落實參演～

古天樂一向鐘意做善事又積極於各項贊助投資，佢嘅電影製作公司早前耗資4.5億港元製作電影《明日戰記》，想向外界證明香港科幻片已經可以達到國際水準～而古仔最為港人熟悉嘅代表作《尋秦記》電影版亦都正式開拍，今次古仔除咗有份投資外，仲聯同當年TVB劇集版嘅演員林峯、宣萱、雪兒、郭羨妮、滕麗名參與演出，大家嘅集體回憶將會重現，對於香港人嚟講絕對係一大好消息。

Photo from 《尋秦記》劇照

曾經多次有傳會開拍《尋秦記》電影版，古天樂於昨日（20號）嘅發布會上，終於公布2019年將會推10幾齣港產片，亦落實《尋秦記》電影版開拍嘅消息～

Photo from kootinlok_louis@Instagram

《尋秦記》除咗係古仔嘅代表作外，亦係香港人嘅集體回憶，大家最想知道嘅一定係電影版嘅參與演員，古仔表示用原班人馬先好睇，所以今次亦會由古天樂、宣萱、林峯、郭羨妮、雪兒同埋滕麗名等當年有份參與《尋秦記》劇集版嘅演員出演。

Photo from kootinlok_louis@Instagram

當年TVB播出嘅《尋秦記》，講述特種部隊人員項少龍喺執行任務嘅時候，意外穿越到戰國時期，參予秦始皇統一天下嘅戰事，而今次拍攝《尋秦記》電影版，絕對唔係重拍劇集版咁簡單，到底有咩突破，就要請大家好好期待！

Photo from 《尋秦記》劇照

早於3年前已經傳出古仔有意開拍《尋秦記》電影版，唔指觀眾覺得興奮，各位演員都好期待！宣萱亦表示自己已經開心咗幾年，今次演出不容有失。

Photo from 《尋秦記》劇照

Text：TopBeauty Editorial

Photo Source：《尋秦記》，Weibo ，Instagram