Lifestyle Movie

爆萌喵星人Goose、打鬥飛行場面親身上陣!必入場睇《 MARVEL 隊長》五大原因

13/03/2019

《 MARVEL 隊長》剛剛上映就差唔多場場都爆滿,作為Marvel首位女英雄、與《復仇者聯盟3、4 》有著緊密關係,拯救世界嘅關鍵人物,單單呢幾個原因已足以叫Marvel迷乖乖入場觀看~不過,以下呢5個亦係值得細心觀賞嘅原因!

必入場睇原因一:爆萌喵星人Goose

《 MARVEL 隊長》中其中一個重要嘅角色就係可愛喵星人Goose,Goose喺電影中有重要戲份,同時亦係電影吉祥物!早前為宣傳電影開Live只影住Goose行行企企,就已經吸引咗30萬人觀看,成功以可愛爆萌樣俘虜唔少人~!

必入場睇原因二:奧斯卡影后Brie Larson的精湛演技

Brie Larson係童星出身,2016年於電影《抖室》中飾演一名被困密室、因姦成孕嘅少女而技驚四座,年僅26歲就勇奪奧斯卡影后寶座,Brie曾表示佢接下Marvel隊長一角就係想將演員情感同專業帶到英雄電影中。

必入場睇原因三:為打鬥飛行場面就自上陣,進行了9個月嚴格訓練

Marvel隊長本身係一名空軍飛行員,而戲中有唔少動作場面,為此Brie Larson用咗9個月進行嚴格特訓包括學習拳擊、柔道、摔角以及巴西柔術等搏鬥技術。

另外,Brie Larson為令飛行畫面更逼真,更參與真實空中訓練,並坐喺機上同機師一同以高速飛行,令她嘔吐大作,不過即使辛苦佢都好堅持,為嘅就係可以拍到好畫面!

必入場睇原因四:《復仇者聯盟3》中拯救人類的關鍵人物

仲記唔記得《復仇者聯盟3:無限之戰》結尾中,「神盾局局長」Nick Fury 喺消失之前以傳呼機急召Marvel隊長,種種跡象都暗示佢係拯救世界,能夠同Thanos一戰嘅最強英雄,喺《復仇者聯盟4》中擔任關鍵角色,同復仇者情節環環相扣!

必入場睇原因五:首位Marvel女英雄

Marvel隊長係Marvel首個有獨立電影嘅女英雄,超越咗「黑寡婦」。鑑於DC推出嘅《神奇女俠》大受歡迎,Marvel驚覺原來女英雄都有市場價值,但黑寡婦嘅能力同身份都大受限制,所以就推出Marvel隊長打頭陣~Marvel隊長擁有超強能力,仲可以能穿梭時間空間,被譽為「最強英雄」。

Text:TopBeauty Editorial

Photo source:Pinterest