愛情世界需要這種一針見血！「為了寂寞而拍拖，只是代表你不懂照顧自己～」

By Michelle on 14 Mar 2019

Digital Editor

剛剛過完白色情人節，你有發現身邊有咁嘅朋友嗎？因為頂唔順寂寞、頂唔順閃光彈，而嚷著：「我要拍拖！」人受到刺激時，總係會瞬間產生想改變嘅衝動。但喺拍拖前，記得守住呢條底線—唔好將拍拖當成解寂寞嘅任務。因寂寞而拍拖，你會發現結局往往係悲傷大於幸福，悲傷唔係來自於拍拖嘅動機，而係代表我哋無好好照顧自己。

Photo from from Pinterest

為寂寞而拍拖，有浪費時間嘅風險

一開始因為唔想寂寞而拍拖，各種悲劇就會接踵而來—當你隨便開始一段感情，但未有深入了解後就開始交往，交往一陣後，覺得對方唔好，後悔自己因為一時激情、衝動開始關係。最後你會發現花幾個月拍拖，又要再花多啲時間走出失戀嘅痛，甚至遇上恐怖情人，難以甩身......因為寂寞而拍拖，到頭來只係一種浪費青春嘅過程，時間一直推進，而你漸漸失去清晰嘅目標。

Photo from from Pinterest

你忘記自己其實都可以陪伴自己

當你唔識去陪伴自己、聆聽自己內心世界，就會開始希望從他人身上得到呢份關懷。但你為咗得到其他人嘅陪伴，更多時候，你付出更多、代價更大。你付出時間、精神、情緒，去應付另一個人，講到尾，只係因為你唔想應付自己。與其應付某一個人，何不好好應付自己需要？當中家都深信「只要有陪伴，就唔會寂寞」，所以一窩蜂往外尋求其他人嘅陪伴，卻偏偏忘記你都可以陪伴自己。