朱千雪自爆素顏參選港姐！2012年港姐面試無化妝上陣，只靠塗唇膏秀天然美貌～！

美麗與智慧並重嘅朱千雪一直深得觀眾歡心，大方得體嘅形象令人望落好舒服，2012年參選雖然只得季軍，但就成為觀眾心目中嘅「民選冠軍」，而日前千雪接受訪問時則自爆，當年參加港姐面試時係全素顏上陣，只係搽咗少少唇膏，力證自己嘅天然美貌！

朱千雪於2012年參選香港小姐，該屆選用全港觀眾一人一票制度，但最後電腦失靈令佢只得港姐季軍，不過喺大家心目中朱千雪係「民選冠軍」，佢更以季軍身份代表香港參選《2012年國際小姐選舉》！

2014年朱千雪出演大台電視劇《EU超時任務》女主角凌晨風，演技大獲好評成功入屋～西門菲莎大學畢業嘅佢，2015年向大台請假1年修讀香港中文大學企業傳播社會科學系碩士學位，2016年順利畢業，並於同年修讀香港城市大學法律博士學位，被網民稱為「Law界女神」！

朱千雪入行數年甚少傳緋聞，而且生活十分貼地，常被影到搭巴士地鐵、到便利店買嘢食等，一啲都無明星架子～

日前千雪出席活動時接受訪問，自爆自已當年係以全素顏參加港姐面試，只係搽咗少少唇膏，雖然膚色偏健康風，但睇得出佢嘅五官同而家一樣又自然又靚～！

https://youtu.be/EVCAgn83Uk8

有樣有身材更有智慧，相信朱千雪係詮釋香港小姐嘅精神嘅最佳例子之一啊～！

Text：TopBeauty Editorial

Photo source：Instagram, Weibo, TVB

Video source：YouTube