《是咁的，法官閣下》林秀怡入行9年終憑演技被留意，曾到餐廳兼職幫補家計，人工試過4位數字～

台慶劇《是咁的，法官閣下》自播出以來大受好評，劇集有別於以往律政劇，今次更多講述新晉律師嘅辛酸以及業內鮮為人知嘅一面，大膽嘅嘗試，為觀眾帶來唔少新鮮感，而劇中飾演大律師嘅林秀怡入行9年，終於有機會擔演重要角色，更憑住出色嘅演技，成功緊抓觀眾眼球，獲網民大讚！

Photo from 《是咁的，法官閣下》劇照

林秀怡入行9年，今次參演《是咁的，法官閣下》喺劇中飾演大律師，而呢套劇更係佢入行以來最重戲份嘅一套。

Photo from 《是咁的，法官閣下》劇照

其實林秀怡過往演出一直都好搏，2012年《怒火街頭》入面，佢仲大膽半裸演出，同時佢又試過為拍劇增肥20磅，因此得到唔少監製欣賞，林秀怡曾經透露過希望更多觀眾留意傍佢，即使要瞓身演出都唔介意～

Photo from 《怒火街頭 》劇照

演藝圈嘅路一啲都唔易行，初頭加入TVB嘅林秀怡，人工曾經試過得4位數字。因為佢係屋企入面嘅經濟支柱，為咗幫補家計，佢試過邊返TVB邊喺餐廳到做兼職，手頭緊嘅時候，仲會去朋友餐廳打工。上年，林秀怡諗住「搏一鋪」，於是打本同朋友合資開餐廳做生意，   佢仲透露自己為咗開店，用盡哂所有積蓄。

Photo from kirbysau@Instagram

劇集播出後，佢得到唔少網民留意，認為佢比其他演員演得更出色，而林秀怡得知角色被讚後，都表示感謝觀眾們嘅關注：「好多謝大家啊，多謝大家有留意我，好感動。我哋其實收到劇本之後，都有做好多圍讀，俾所有演員了解吓每個角色嘅定位同性格。而且大家都有約埋一齊去法庭聽審，聽咗好多次，我哋要留意喺法庭上每一個職位嘅人係點，所以都比較真實，無咁多戲劇效果嘅戲，希望大家都會接受呢啲新類型劇集。」

Photo from kirbysau@Instagram 

Photo from kirbysau@Instagram